नेपाल प्रहरीकी संगीता राईले राष्ट्रिय भारोत्तोलन प्रतियोगितामा नयाँ राष्ट्रिय कीर्तिमान बनाएकी छन् ।
राखेप च्याम्पियनसिपअन्तर्गत भएको २३औं पुरुष तथा आठौं महिला राष्ट्रिय भारोत्तोलन प्रतियोगितामा उनले राष्ट्रिय कीर्तिमानी बनाएकी हुन् ।
४८ केजी तौल समूह क्लिन एन्ड जर्कमा ६६ केजी भार वहनका साथ नीता थापाको नाममा रहेको कीर्तिमानलाई पछाडि पार्दै नयाँ राष्ट्रिय कीर्तिमानमा आफ्नो नाम लेखाउन उनी सफल भएकी हुन् । उनले स्न्याचतर्फ ५२ केजी भारका साथ कुलमा १ सय १८ केजीका साथ स्वर्ण पदक प्राप्त गरेकी छन् ।
नीताले २०६२ सालमा वीरगन्जमा भएको राधिका स्मृति कपमा राखेको ६५ केजी तौलको राष्ट्रिय कीर्तिमान राखेकी थिइन् । सेनाकी मनिषा रानाभाटले रजत पाइन् । उनले स्न्याचमा ५१ र क्लिन एन्ड जर्कमा ६३ केजी गरी कुल १ सय १४ केजी भार बहन गरेकी हुन ।
झापाकी करिना चौधरीले स्न्याचमा ३५ केजी र क्लिन एन्ड जर्ककमा ५१ केजीका साथ कुलमा ८६ केजी उचाल्दै तेस्रो भइन् । पहिलो दोस्रो र तेस्रो हुनेले स्न्याच, क्लिन एन्ड जर्क र कुलमा गरी तीन स्वर्ण प्राप्त गरे ।
