बिहीबार राजधानीमा एक कार्यक्रम गर्दै ‘बिर बिक्रम २’को घोषणा गरिएको छ ।
मिलन चाम्सको निर्देशनमा बन्न लागेको चलचित्र ‘बिर बिक्रम २’ मा पुराना कलाकारको रूपमा नाजिर हुसेन मात्र दोहरिने छन् ।
चलचित्र ‘बिर बिक्रम २’ मा नयाँ कलाकारमा नायक आकाश श्रेष्ठ, नायिका वर्षा सिवाकोटी, बुद्धि तामाङ रहने छन् । त्यस्तै बालकलाकारको रूपमा मनिष लिम्बुले डेव्यु गर्दैछन् ।
चलचित्रमा आकाश र वर्षाको अलावा बिनिशा भण्डारी, शिशिर राणा, क्षितिज सुवेदीलगायतका कलाकारको भूमिका रहने छ ।
चलचित्र युनिटले कलाकारलाई भव्य रूपमा स्वागत गर्दै चलचित्रको घोषणा गरेको थियो । तिहार लगत्तै छायाँकन सुरु हुने ‘बिर बिक्रम २’को चलचित्रमा संगीत रंजित गजमेर, राजनराज सिवाकोटी, तारा प्रकाश लिम्बुको रहने छ । सुदिप बरालको छायाँकन रहने चलचित्रमा कोरियोग्राफी कविराज गहतराज, कथा प्रदिप भारद्वाजले लेखेका हुन् भने द्वन्द्व हिमाल केसी, सम्पादन बनिष शाहको रहने छ ।
यस्तै चलचित्रका निर्माता मिलन चाम्स, सह निर्माताका रुपमा अर्पण सापकोटा रहेका छन् भने चाम्स इन्टरटेन्मेन्ट र लन्डन सिने आईको ब्यानरबाट बन्न लागेको हो ।
