चलचित्र ‘गोपी’ले कविता प्रतियोगिता आह्वान गरेको छ ।
चलचित्र गोपीको निर्माण कम्पनी आरोही इन्टरटेनमेन्ट प्रालिले बुधबार नगद पुरस्कारसहितको कविता प्रतियोगिता घोषणा गरेको हो ।
रंग पत्रकार दिपेन्द्र लामाको निर्देशन रहेको चलचित्र ‘गोपी’ माघ १८ गतेबाट रिलीज हुँदैछ ।
उक्त प्रतियोगितामा सहभागीले चलचित्र गोपीको ट्रेलर हेरेर स्वावलम्बन, स्वरोजगार र परिश्रमको भाव झल्किने कविता लेख्नुपर्ने हुन्छ । प्रतियोगितामा प्रथम, द्वितीय र तृतीय हुनेलाई क्रमशः ३० हजार, २० हजार र १० हजार रुपियाँ पुरस्कार प्राप्त गर्नेछ भने सात जनालाई सान्त्वना पुरस्कार जनही ५ हजार रुपियाँ प्रदान गर्ने छ ।
सहभागीहरुबाट प्राप्त कवितालाई दुई कवि उपेन्द्र सुब्बा र नवराज पराजुलीले मूल्यांकन गरेर विजेता छनोट गर्ने छन् ।
चलचित्र ‘गापी’मा विपिन कार्की, वर्षा राउत, सुरक्षा पन्त, रमेश अधिकारी, अंकित खड्का, प्रकाश घिमिरे, भोलाराज सापकोटा, सरोज अर्याललगायत कलाकारको भूमिका रहेको छ ।
सामिप्यराज तिमिल्सेनाको पटकथा तथा संवाद, शैलेन्द्र डि कार्कीको छायांकन, गोविन्द राईको कोरियाग्राफी, न्यु वज्राचार्य, अर्जुन पोखरेल, कल्याण सिंहको संगीत, निमेष श्रेष्ठको सम्पादन रहेको छ ।
