‘चङ्गाचेट’मा समावेश ‘गोजीमा दाम छैन’ बोलको गीतले युटुबमा डेढ करोड भ्यूज पाएपछि निर्माणपक्षले काठमाडौंमा एक कार्यक्रम आयोजना गरी संगीतकार राजनराज सिवाकोटीलाई ५० हजारको चेक हस्तान्तरण गरियो । गीत हिट भएकाले चलचित्रको हाइट पनि बढेको भन्दै निर्माता माधव वाग्लेले संगीतकार सिवाकोटीलाई उक्त चेक हस्तान्तरण गरिएको हो ।
काठमाडौंमा आयोजित कार्यक्रममा चलचित्रका मुख्य कलाकारद्वय परमिता राज्यलक्ष्मी राणा र सुरक्षा पन्तको साथमा निर्देशक दीपेन्द्र के खनाल, निर्माताद्वय माधव वाग्ले र शर्मिला पाण्डे, संगीतकार सिवाकोटीलगायतले केक काटे । निर्माता वाग्लेले भने– ‘गीतले एक करोड बढी भ्यूज पाएको खण्डमा उपहार दिन्छु भनेको थिएँ । सोही अनुसार उपहार दिएको हुँ । यो उहाँको पारिश्रमिक होइन ।
’ चलचित्रमा प्रियंका कार्की, आयुष्मान देशराज जोशी, परमिता राज्यलक्ष्मी राणा, सुरक्षा पन्त, रविन्द्र झा, सन्दीप क्षेत्रीको मुख्य भूमिका रहेको छ । कात्तिक १६ गतेबाट रिलिज हुने चलचित्रले कमेडी कथामा गम्भिर विषयलाई उठान गरेको छ ।
