नेपाली कांग्रेस संसदीय दलको नेतामा शेरबहादुर देउवा निर्वाचित भएका छन् ।
पूर्वमहामन्त्री प्रकाशमान सिंहलाई २५ मतान्तरले पराजित गर्दै पार्टी सभापति देउवा दलको नेता चुनिएका हुन् । अब उनी प्रमुख विपक्षी दलको नेता बन्नेछन् ।
सभापति देउवा र पूर्वमहामन्त्री सिंहले आइतबार साँझ संसदीय दलको नेताका लागि आ-आफ्नो दलबलसहित उम्मेदवारी दर्ता गराएका थिए। देउवाले साँझ ६ बजे र सिंहले त्यसको आधा घण्टापछि उम्मेदवारी दर्ता गराएका थिए । दलको नेताका लागि सोमबार बिहान १० बजदेखि १ बजेसम्म सिंहदरबारस्थित संसदीय दलको कार्यालयमा मतदान भएको थियो।
प्रतिनिधिसभामा कांग्रेसका ६३ सांसद छन्। संसदीय दलको अंकगणितमा देउवा अगाडि देखिएका थिए। देउवा पक्षकै बहुमत भए पनि सिंहले पनि आफूले चुनाव जित्ने दाबी गरेका थिए।
